Muorrekeatstoernoai Sibrandabuorren

Op 24 november 2024 om 13:00 uur

locatie: It Mingeltsje Sibrandabuorren

Muorrekeatsen B-groep

Op 26 november 2024 om 18:30 uur

locatie: It Mingeltsje Sibrandabuorren

Muorrekeatstoernoai Sibrandabuorren

Op 24 januari 2025 om 18:30 uur

locatie: It Mingeltsje Sibrandabuorren

bekijk de hele agenda

Prachtich begjin mei Himmel & Skjin-Johannes Doumapartij

zaterdag 27 april 2024

Ofskied Marten en Catrinus, ôfskied en wolkom foar Aaltsje

Neidat de jongerein útkeatst wie waarden neffens tradysje earst de ôfskiednimmende kommisjeleden yn 't sintsje setten troch foarsitter Jouke Dotinga. Marten Molenmaker stoppe nei safolle jierren mei de Sponsorkommisje. Letter op 'e dei - nei it keatsen - wie Catrinus Kooistra oanwêzich en waard him ek hulde brocht foar syn jierrenlang krewearjen foar de Sponsorkommisje. Foar dizze mannen wie net in lintsje, mar wol in grut pakket mei lekker itensguod. Aaltsje Kroes hat nei 7 jier de Frouljuskommisje ferlitten en is promovearre nei de Jeugdkommisje. Hja bliuwt dus yn byld.

Dan no de wedstriden.

Twa klassen: in AB-klasse mei 6 partoeren en in BC-klasse mei 11 partoeren. It waar wie goed, better as it west hat de wiken dêrfoar, mar genôch oer it waar.

AB-klas

Yn dizze klasse wienen twa pûls mei trije partoeren. En der waard striid levere mei moaie partijen foar it neutrale én it partijdige publyk. Nei twa partijen hienen Jouke Dotinga, Moniek Lootsma en Jan Feenstra de folle bút binnen. Se mochten dus yn ‘e finale oantrêde tsjin Jelmer Drijfhout, Wybren Jorritsma en Martsen van der Goot. Martsen mocht as jonkie dus mei de ‘kanonnen’ spylje en die dat treflik. Al hienen Drijfhout de earste partij yn de pûl ferlern fan Jelmer de Jong, Johan Cnossen en Feiko Scheepvaart (hy wie der wer nei in jier fan blessuereleed), yn de finale lutsen se oan it langste ein: 5-3 6-2, en dat wie fertsjinne.

BC-klas

De 11 partoeren lieten ek in moaie striid sjen. Yn de earste omloop waard útmakke wa’t nei de linker en wa’t nei de rjochterkant fan de list gean soe. Oer it algemien wienen de partijen yn de earste omloop wol wat iensidich. Yn de twadde omloop waard yn de ferliezersrûnte heftich striid levere mei spannende partijen.

Yn de ferliezersfinale kamen tsjin elkoar út Folkert Yde Kievit, Esmee Suierveld en Marten Molenmaker en trio Ruurd Jan Leenstra, Antsje Kievit en Anna Marit Twijnstra. Ruurd Jan en syn maten wûnen dat yn in moaie partij op 5-4 6-2.

Yn de echte finale moasten Kim van der Meulen, Jelmer Molenaar en Doutzen Twijnstra it opnimme tsjin Jan de Groot, dy't ek werom is fan in blessuere, Bertus Dotinga en Boukje Brouwer. Beide partoeren wienen oan elkoar weage. Wie der yn de ferliezersfinale in striid tusken mem-soan, yn dizze partij wie dat mem Boukje tsjin dochter Kim. Yn in prachtige finale, mei sterk spul oan beide kanten, wûnen Jan en syn maten op 5-4 6-2.

Yn de heale finale hienen Kim c.s. maklik wûn fan Kristia Dotinga, Femke Terpstra en Oeds Broersma, 5-1 6-0.

De totaalútslach