Ledefergadering Kf DLG freed 7 novimber

Op 7 november 2025 om 20:00 uur

locatie: Ús Gebou te Gau

Jitse, Eelco en Wiebe winne 3de priis op kampioenskip Súdwest-Fryslân foar basisskoallen

woensdag 4 juni 2025

Goaiïngea. Dat wie mei de kampioenskippen foar basisskoallen fan de gemeente Súdwest-Fryslân. Eelco Kiestra, Wiebe Huitema en Jitse Bakker (f.l.n.r. op 'e foto hjirûnder) hellen dêr in 3de priis by de jonges B-klas. Sy meie op woansdei 11 juny yn Frjentsjer op it Sjûkelân de swarte kleur fan Mienskipsskoalle De Legeaën ferdedigje op de provinsjale kampioenskippen. Yn de B-klas 16 partoeren fan de ferskate basisskoallen yn de gemeente Súdwest-Fryslân mei. Foar de jonges A wie der gjin wedstriid, omdat mar twa skoallen har opjûn hienen.

De 1ste en 2de priiswinners fan de famkes A en B meie op 11 juny meidwaan yn Frjentsjer en de 1ste, 2de en 3de priiswinners fan de jonges B.

Goede organisaasje

De famkes A-klas bestie út fjouwer partoeren en yn de famkes B-klas sieten 8 partoeren. De organisearjende feriening kf De Lege Geaen, wy dus, hie de saken goed foar elkoar mei in kundich skiedsrjochterskorps/tagelyk listbyhâlders! Johan Cnossen hie de lieding oer de famkes B, Pieter Feenstra fan de federaasje WBW paste op de famkes A. Gerrit Koudenburg en Age van der Goot ûntfermen har oer de jonges B-, holpen troch Jan Steigenga, ek fan de federaasje WBW en tagelyk kommisjelid fan de skoalkeatserij fan SWF en troch Harmen van Gelderen, ek lid fan de kommisje fan it skoallekeatsen yn SWF (earder yn de gemeente Wymbritseradiel, al sûnt 1990, ja ja!)

Oeds Broersma hie de krânsen brocht út Wytmarsum wei, de krânsen fan de famylje Anema (dit jier foar it lêst!).

En Gerrit van der Leeuw prate alles oan elkoar op syn fertroude manier en hy die ek de priisútrikking. En fan fansels foarsoarge it deskundige barpersoniel de hapjes en de sapjes. En dêr boppe sweefde as supervisor Marco van der Goot. Hy rûn geregeld mei in slaai yn 'e hannen om wer in pinne by in boppepeal de grûn yn te slaan!

En de fjilden leinen der prachtich by, it gers in bytsje te lang, dat wol, mar it waar makke alles goed!

Jonges A (gjin wedstriid)

Foar dizze klasse hienen har opjûn CBS It Fûnemint – Wommels ((Redmer Politiek-Fender Flisijn-Syan Bults) en OBS De Útskoat – Wytmarsum (Lennart Wagenaar-Sem Elgersma-Arne Zandbergen). Dizze twa skoallen meie automatyske meidwaan op 11 juny yn Frjentsjer oan it provinsjale kampioenskip jonges A.

Jonges B

In aardige finale fûn plak tusken CSB De Bonkelder fan Wytmarsum mei Bouwe Postma, Sjoerd fan der Schaaf en de sterke man Danny Terpstra, en de OBS Epemaskoalle fan Ysbrechtum mei de twa jonges Sheng Li Dijkstra en Jens de Vries. De twa 'mantsjes' fan Epema joegen knap partij en der hie miskien noch wat mear yn sitten, mar de winst gie fertsjinne nei De Bonkelder, 5-3 6-6.

De Bonkelder hie yn 'e heale finale De Legeaën ferslein op 5-1 6-4. In wat fertekene stân want der hie mear yn sitten. In 3de priis dus foar de Mienskipsskoalle mei Jitse Bakker, Eelco Kiestra en Wiebe Huitema.

De oare 3de priis wie foar SBO De Súdwester fan Snits mei Roan Brandsma en Klaas-Jelle Greidanus (tredde maat Kayden Oosting wie siik). De Epemaskoalle gunde de trije Snitsers net in earst, 5-0 6-0.

OBS De Útskoat wint by de famkes A

Yn dizze klasse mei fjouwer partoeren wienen allinnic twatallen, dus dat skeelde in krâns en in priis. De Útskoat fan Wytmarsum mei Elske Tassebajof en Maud van der Wei helle 19 punten, twa winstpartijen en ien ferliespartij op 5-5 6-6 tsjin CBS Van Haersma Buma fan De Hommerts. De twa dappere striders fan De Hommerts, Marin Grondsma en Jeldou Raap, hellen yn de earste partij mar in spul, wûnen wol de tredde partij en hellen sa 'mar' 16 punten, mar wol de 2de priis.

CBS De Earste Trimen fan Nijlân fertsjinne nei de winst by de famkes B

Ilse de Graaf en Beber van der Burg fan De Earste Trimen kamen nei twa ridlik ienfâldige winstpartijen yn de finale tsjin de Sint Bonifaciusskoalle fan Reahûs. De Reahústers, mei Geartsje Altenburg, Femke Visser en Anna de Jong, hienen it pittich hân yn de earste omloop (5-5 6-4), mar yn de twadde omloop wie it in makje (5-0 6-2). It waard in moaie finalepartij, dy't op 5-3 6-6 beslist waard yn it foardiel fan De Earste Trimen.

Dizze skoallen kamen yn 'e prizen:

Jonges B (16 partoeren)

1. CBS De Bonkelder – Wytmarsum (Bouwe Postma-Sjoerd van der Schaaf-Danny Terpstra)

2. OBS Epemaskoalle – Ysbrechtum (Sheng Li Dijkstra – Jens de Vries – Morris Stam)

3. MS De Legeaën – Sibrandabuorren (Jitse Bakker-Eelco Kiestra-Wiebe Huitema)

3. SBO De Súdwester – Snits (Roan Brandsma-Kayden Oosting-Klaas-Jelle Greidanus)

Werkânsing

1. SBS De Romte - Itens (Jort Kronemeijer-Thys Strikwerda-Else Zeinstra)

2. CBS It Fûnemint - Wommels (Wybren Politiek-Redmar de Boer-Geart-Otte Rypkema)