Jelmer Drijfhout en Maureen Stok sterke winners VeegPiettoernoai

It earste toernoai fan dit bloeiende muorrekeatsseizoen - ús club har mar even 3 x yn 'e wike 'it Mingeltsje' ôfhierd foar it muorrekeatsen - sit derop! Mei in rekôrd oantal dielnimmers: 34 stiks! En de prizepaketten wienen gearstald troch Zorgboerderij Zathe de Hoek fan Offenwier. 

De A-groep - dy fan de sneintemiddei - sprong der mei 21 dielnimmers hielendal út, want safolle hienen der op de normale sneintemiddei noch net west.  Dêr foaroer stie de B-groep fan de tiisdeitejûn, dy't mei 13 dielnimmers wat minder fertsjintwurdige wie. Oan 'e oare kant, op de tiisdei sitte se altyd om de 20 dielnimmers hinne! 

De A-groep begong  al om 12.30 oere fanwegen de grutte opkomst en 15.30 koe de B-groep pas los. 

Nolke Bergstra hjitte elkenien fan de A-groep wolkom. De lotting wie bekend en elk mocht 6x yn aksje komme, 18 punten út wie it devys! En, dat moat sein wurde, de lotting wie prima útfallen. Der wienen mar kwealik iensidige partijen. Mei in protte ynset waard spile, mei prachtige rally's en soms hilaryske mominten. Ja, it is in moai spultsje!

Grutte man wie dizze middei Jelmer Drijfhout. As iennichste wûn hy alle 6 partijen, al bist fansels ôfhinklik fan de maten dy'tst krijst.  Mar asto dan alles winst, ja dan hinget it net hielendal fan syn maten ôf, dan is it fertsjinne! Achter Jelmer eingen mar even 4 minsken mei 5 winstpartijen, dat wie dus bloedspannend. 

En gelokkich wie der net ien dy't alles ferlern hie. 

Hjirûnder fine jim de totale einútslach. Totaal = Winst x 18 + Saldo pnt.

De B-groep - ús froulju -  spilen mei 16 punten per partij. Mar sy mochten allegearre 8x yn aksje komme. Toernoaidirektrise Siebrigje Nynke Boschma hie de lieding en sa kaam it dat yn twa oeren de striid beslikke wie. Doe koe Nolke de útslaggen yn de kompjûter ynfiere. Net ien fan de froulju helle de folle mep binnen! Der wienen twa froulju mei 6x winst en trije mei 5x winst. Tusken Maureen Stok en Kim van der Meulen spande it derom. It puntesaldo joech úteinlik de trochslach.  En gelokkich wie yn dizze groep ek net ien dy't net in partij wûn hie. En sa moat it ek.