Fakânsjepartij mei waar as spek

Kwa waar koe it net better. Kwa keatsen wie der in protte spanning, yn beide klassen.  Dêroer straks mear. It wie in echte fakânsjepartij. It begong relaxed om 14.00 oere en tsjin njoggenen wienen de prizen al útrikt troch Jouke Dotinga. Net ien hie haast, sa like it wol.

Mei 4 partoeren yn de A-B-klas koenen de sterkere mannen har wer lekker útlibje.  Nei twa omlopen wienen de kaarten wol skodde, sa like it. Timen van Gelderen, Jan Feenstra en Marco van der Goot hienen 2x wûn, mar wol mei flink wat tsjinearsten. En dat briek harren op, wat yn de beslissende partij tsjin Wybren Jorritsma, Feiko Scheepvaart en Gerben Wierda krigen dy mar 1 earst. Exit Van Gelderen c.s.

It wie ôfwachtsjen wat de oaren dwaan soenen. It bleau lang ûnwis. De winner  fan de partij tusken Jouke Dotinga en Jurjen Hiemstra en it duo Marco Lobregt en aspirant-lid Arjen Visser soe de krânsen om krije. En dat waarden Marco en Arjen op 5-5 6-2, de mannen mei de sterkste senuwen.

En sa pakten Wybren, Feike en Gerben dochs noch it silver. 

Nei it steande nûmer yn de earste omloop moasten se daliks oan 'e bak tsjin Tara van der Meulen, Jelmer Molenaar en Etta Dotinga. Dat wûnen se, 5-4. En doe wachten dêr op 'e tredde list Rijkel Dotinga, Harmen van Gelderen en Wietske Boschma, ek net snotterich. Spitich genôch koe Petra Fekken de partij net trochkeatse troch in rare kearaskje. Etta Dotinga foel - fris ûnder de dûs wei - yn foar Petra. En se makken it fakkundich út op 5-4 6-2.

En doe wie it oan Jelke Hindrik de Vries, Aaltsje Wesselius en Wytse Hospes om harren stikken te biten op de sterke formaasje De Groot- Veenstra-Dotinga. En dat dienen se, ûnder ferheftige tsjinstân, dat wol, 5-4 6-0. 

Yn de ferliezersfinale keatsten Marrit Oosterbaan, Femke Terpstra en Oeds Broersma sterk tsjin Kim van der Meulen, Wytse Symen Boschma en Rixt Velstra. En se wûnen op 5-3 6-2.

Rixt Velstra